Kreistagswahl in sorbischer Sprache

Čehodla serbsce? Cyle jasnje!

Serbska rěč a kultura słušatej runje tak, kaž Łužiska jězorina, Łužiske hory abo tykowane domy k Łužicy.Za mnohich tu bydlacych stej serbska rěč a kultura zakładaj identity, dźělej swójskeje tradicije abo samo maćerna rěč. Wonej słušatej z dawnych časow k wšědnemu dnjej w našej domiznje. Tež dźensa je serbšćina we Łužiskich městach a wjeskach žiwa rěč a so wšědnje nałožuje. Wona je němčinje runohódna a přez Saksku wustawu škitana.

Serbska kultura słuša k Łužicy a je wažny dźěl našeho kulturneho bohatstwa.

Tohodla je za nas CDU samozrozumliwe, zo naš wólbny program a wólbne materialije tež w serbskej rěči wozjewimy. Chcemy z tym pomhać, rěčne rumy serbskeho ludu aktiwnje zdźeržeć.

Za to stejimy.

Unija, skutkowaca we wokrjesu Budyšin, je ludowa strona srjedźizny. Naša politika złožuje so na křesćanske zrozumjenje čłowjeka a jeho zamołwitosću před Bohom. Wěmy, zo njehodźi so z křesćanskeje wěry wěsty politiski program wotwodźeć. CDU je kóždemu wotewrjena, kotryž dostojnosć a swobodu wšitkich čłowjekow připóznawa a z toho wuchadźacemu zakładnemu přeswědčenju našeje politiki přihłosuje. CDU ma konserwatiwne, liberalne a křesćansko-socialne korjenja. CDU wobchowuje a skrućuje na křesćanstwo wusměrjene zakłady a hódnoty našeje swobodneje demokratije. Z tutych wotwodźujemy swobodu, solidaritu a runohódnosć jako zakładne hódnoty. Tute hódnoty trjebaja a wudospołnjeja so mjez sobu. Čłowjek bu swobodny stworjeny. Swoboda druheho požada a wobmjezuje swójsku swobodu. Je nadawk politiki, ludźom trěbnu swobodu zawěsćić a jich zdobom do zamołwitosće za towaršnosć wzać. Wěmy, zo njeje žaneje swobody bjez runoprawnosće. W prawniskim staće woznamjenja runoprawnosć jenake prawo za kóždeho. Wono škita před swojowólnosću a znjewužiwanjom. Naše prawo škita tež swobodu słabšeho. Unija we wokrjesu Budyšin ma z lěta 1990 bytostnu politisku zamołwitosć. Pod aktualnymi wobstejnosćemi chcemy wuhotowanje přichoda za naše gmejny a našich wobydlerjow k dobremu wowliwować. Z tym chcemy dobre wuwiće wokrjesa Budyšin zmóžnić, kotryž jako wjesnu krajinu wobhladujemy. Při tym tež wužadanja dwurěčnosće w sydlenskim rumje Serbow wažnu rólu hraja.

Jasny kompas – krute zasady

Fundament našeje politiki su tři kruće zakótwjene jednanske zasady: Solidne financy su zakład wuspěšneho wuwića. Dźiwamy na zamołwity wobchad z financnymi resursami a na jasne priority při inwestowanju. Socialna zamołwitosć je bytostny zakład našeho jednanja. Podpěrać socialnje słabych je nam zasada. Runje tak wažne je za nas pomoc młodźinje. Wona steji za nas we wosebitym fokusu. Zhromadne žiwjenje Němcow a Serbow twori a wobohaća našu regionalnu towaršnosć. Škit a spěchowanje serbskeje rěče, kaž tež serbskeje kultury je a wostanje naš zaměr.

Strowota a hladanje

Wo čo dźe:

Dobre mediciniske zastaranje a poskitki hladanja, kotrež su na ­potrjeby pacientow wusměrjene, su wažny dźěl kwality ­žiwjenja, ­kotrež wobydlerjo našeho ­wokrjesa wočakuja.

Što chcemy:

Z chorownjemi w nošerstwje wokrjesa Budyšin chcemy zhromadnje ze wšitkimi dalšimi nošerjemi chorownjow system centrumow mediciniskeho zastaranja (CMZ – němsce MVZ) wutwarić a tak mediciniske zastaranje wšudźe a bjezwuwzaćnje dale we wysokej kwaliće zaručić. To samsne płaći za stacionarne a ambulantne posłužby hladanja. Wone domjace a čestnohamtsce wukonjane hladanske posłužby skutkownje wudospołnja. Poskitk posłužbow doma ma tomu přinošować, zo móhli wobydlerjo dołhož móžno w swojej domjacej wokolinje wostać.

Kubłanje

Wo čo dźe:

Wokrjes je nošer zakładnych a wyšich šulow, gymnazijow, spěchowanskich šulow a powołanskich šulskich centrumow. Z pomocu wjetšich ­inwesticijow smy hižo mnoho šulow a ­sportowych halow ponowili.

Što chcemy:

Wšitke powołanske šulske centry wokrjesa zdźeržeć. Dale inwestować, mjez druhim w ­Kamjencu, Barće a Kinsporku. Kóžda komuna měła móžnosć měć, swoju wyšu šulu abo ­gymnazij do nošerstwa wokrjesa přepodać. Sportowe hale měli wšitkim towarstwam přistupne być.

Mobilita

Wo čo dźe:

Faworizujemy dale busy, ćahi a awta, zo bychu wšitke wsy a města we wokrjesu docpějomne byli.

Što chcemy:

Chcemy busowu syć kaž tež šulski transport polěpšić. Za to chcemy mjez druhim jednotny tarif za cyły wokrjes wutworić, jedno- a dwuhodźinske taktowanje zwiskow zawjesć a poskitk busow k wotwołanju powyšić. Železnisku syć chcemy dale wutwarić. Na přikład přez elektrifikowanje čary Zhorjelc-Drježdźany, přez wutworjenje jednotneho tarifa, zasadźenje wjace ćahow na železniskej čarje mjez Drježdźanami a Kinsporkom, kaž tež mjez Biskopicami a Žitawu. Dale chcemy reaktiwěrować železniski zwisk mjez Budyšinom/Kamjencom a Wojerecami. Nadměru wysoki ­niwow inwesticijow do wobchadneje syće we wokrjesu Budyšin chcemy zdźeržeć.

Socialna a młodźinska pomoc

Wo čo dźe:

Štóž je w nuzy, dóstanje pomoc.

Što chcemy:

Wuwiće dźěći a młodostnych w jich swójbach a w towaršnosći mamy wosebje spěchować. Runje tak mamy je před ­strachami škitać.

Wotpadki

Wo čo dźe:

Čehodla wo wotpadkach rěčeć, hdyž w našim wokrjesu wšitko bjez problemow běži?

Što chcemy:

Nam je wažne, zo derje ­fungowacy system rumowanja a předźěłanja wotpadkow zdźeržimy a to za wšitkich wobydlerjow při stabilnych popłatkach.

Digitalizacija

Wo čo dźe:

Wokrjes je z wobšěrnym wutwarom lěpšich digitalnych syćow za spěšny internet hižo započinał. Po zhotowjenju měli nowe techniske móžnosće konsekwentnje wužiwać.

Što chcemy:

Hač do kónca 2020 chcemy wotpowědne zakłady tworić, zo móhli wšudźe digitalnu syć za internet ze znajmjeńša 100 Mbit/s spěšnosću instalować. Po tym chcemy zarjady w digitalnym dźěle wukmanić, zo bychu posłužby byli lěpše, transparentniše a kmańšo wotpowědowali potrjebam wobydlerjow. Tež chcemy “digitalne ­wuknjenje” dale wutwarić a šule z wotpowědnej techniku wuhotować.

Čestnohamt

Wo čo dźe:

Čestnohamtski angažement je njeparujomny za zdźerženje našeje towaršnosće a ma so dale spěchować.

Što chcemy:

Tomu přinošować, zo by so zaso wjace młódšich wobydlerjow w zjawnym žiwjenju angažowało. Wažne nam je, zo so čestnohamtski angažement zaso sylnišo připóznawa. Wosebje spěchujomne su po našim dobrozdaću koncepty, kotrež nowe móžnosće skrućenja wobydlerskeho angažementa wobsahuja.

Sport a kultura

Wo čo dźe:

Sportowe a ­kulturne ­towarstwa su wažne za žiwjensku kwalitu w našim wokrjesu.

Što chcemy:

Naše ćežišćo je spěchowanje dźěći a młodostnych, zo bychmy dorost za ­towarstwa zawěsćili. Wosebje dźiwamy na podpěru nowych móžnosćow zdźerženja a wuwiwanja kulturneje krajiny našeho wokrjesa.

Wuwiće wokrjesa

Wo čo dźe:

Ratarstwo, rybarstwo, lěsnistwo a turizm su wažne zakłady našeho hospodarstwa, kotrež chcemy zaměrnje spěchować.

Što chcemy:

Wuměnjenja za wuwiće ­turizma dale polěpšić, ­wosebje z widom na wuwiće Łužiskeje jězoriny. Při ratarjenju, ­rybarjenju a w lěsnistwje je wažne, ­runowahu mjez wužiwanjom krajiny, ­pasenjom skotu a škitom zwěriny namakać, resp. zdźeržeć. Zasadnje zwisuje wužadanje wuwića ­hospodarstwa ­wokrjesa wusko z wuwićom starobneje ­zestawy ­wobydlerstwa. Chcemy na krajne planowanje wliw wukonjeć, zo bychmy trěbne změny na polu zjawneho wobchada, bydlenjotwara, pěstowarnjow, šulow a ­mediciniskeho zastaranja docpěli.